ವಿಧಿ 143 ರಾಷ್ಟ್ರಪತಿಗಳಿಗೆ ಇರುವ ವಿಶೇಷ ಅಧಿಕಾರ ಒಂದು ಲೇಖನ
ವಿಧಿ 143 ರಾಷ್ಟ್ರಪತಿಗಳಿಗೆ ಇರುವ ವಿಶೇಷ ಅಧಿಕಾರ ಒಂದು ಲೇಖನ
ವಿಧೇಯಕಗಳಿಗೆ ಅನುಮೋದನೆ ನೀಡಲು ರಾಷ್ಟ್ರಪತಿ ಮತ್ತು ರಾಜ್ಯಪಾಲರಿಗೆ ಗಡುವು ನೀಡಿದ್ದನ್ನು ಪ್ರಶ್ನಿಸಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಇತ್ತೀಚೆಗಷ್ಟೇ ಸಂವಿಧಾನದ 143ನೇ ವಿಧಿಯಡಿ ತಮಗಿರುವ ವಿಶೇಷಾಧಿಕಾರವನ್ನು ಬಳಸಿಕೊಂಡು ಸುಪ್ರೀಂ ಕೋರ್ಟ್‌ಗೆ ಹದಿನಾಲ್ಕು ಪ್ರಶ್ನೆಗಳನ್ನು ಕೇಳಿದ್ದರು.
ಸಾರ್ವಜನಿಕ ವಿಚಾರಗಳಲ್ಲಿ ಉದ್ಭವಿಸುವ ಕಾನೂನು ಸಮಸ್ಯೆ, ಈಗಾಗಲೇ ಉದ್ಭವಿಸಿರುವ ಸಂಗತಿಗಳ ಬಗ್ಗೆ ಸುಪ್ರೀಂ ಕೋರ್ಟ್‌ನ ಸಲಹೆಗಳನ್ನು ಕೇಳಲು ರಾಷ್ಟ್ರಪತಿಗಳಿಗೆ ಸಂವಿಧಾನದ ಕಲಂ 143 ಅನುವು ಮಾಡಿಕೊಡುತ್ತದೆ.
▪️ಏನಿದು ಕಲಂ 143?:
ಸಂವಿಧಾನದ ಕಲಂ 143ರ ಮೂಲಕ ರಾಷ್ಟ್ರಪತಿಗಳಿಗೆ ನೀಡಿರುವ ವಿಶೇಷ ಅಧಿಕಾರವಿದು. ಸಾರ್ವಜನಿಕ ವಿಚಾರಗಳಲ್ಲಿ ಉದ್ಭವಿಸುವ ಕಾನೂನು ಸಮಸ್ಯೆ, ಈಗಾಗಲೇ ಉದ್ಭವಿಸಿರುವ ಸಂಗತಿಗಳ ಬಗ್ಗೆ ಸುಪ್ರೀಂ ಕೋರ್ಟ್ ಸಲಹೆಗಳನ್ನು ಕೇಳಲು ಈ ಕಲಂ ರಾಷ್ಟ್ರಪತಿಗಳಿಗೆ ಅಧಿಕಾರ ನೀಡುತ್ತದೆ.
▪️ಯಾವ ರೀತಿಯ ಪ್ರಶ್ನೆಗಳಿಗೆ ಸಲಹೆ ಪಡೆಯಬಹುದು?
▪️ಕಲಂ 143 (1):
ಎದುರಾಗುವ ಅಥವಾ ಎದುರಾಗಲಿರುವ ಯಾವುದೇ ಕಾನೂನು ಅಥವಾ ಸಾರ್ವಜನಿಕರ ಹಿತದೃಷ್ಟಿಗೆ ಪೂರಕವಾದ ನಿರ್ಣಯಗಳನ್ನು ಕೈಗೊಳ್ಳಲು ರಾಷ್ಟ್ರಪತಿಗಳು ಈ ವಿಧಿಯಡಿ ಸುಪ್ರೀಂ ಕೋರ್ಟ್ ಸಲಹೆಯನ್ನು ಕೋರಬಹುದು. ಇಲ್ಲಿ ಸುಪ್ರೀಂ ಕೋರ್ಟ್ ತನ್ನ ಅಭಿಪ್ರಾಯವನ್ನು ರಾಷ್ಟ್ರಪತಿಗೆ ಸಲ್ಲಿಸಬಹುದು ಅಥವಾ ನಿರಾಕರಿಸಬಹುದು. ಉದಾಹರಣೆಗೆ: 1993ರಲ್ಲಿ ರಾಮಜನ್ಮಭೂಮಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಂದಿನ ರಾಷ್ಟ್ರಪತಿಗಳು ಕೇಳಿದ್ದ ಪ್ರಶ್ನೆಗೆ ಅಭಿಪ್ರಾಯವನ್ನು ಸಲ್ಲಿಸಲು ಸುಪ್ರೀಂಕೋರ್ಟ್ ನಿರಾಕರಿಸಿತ್ತು.
▪️ಕಲಂ 143 (2):
ಸಂವಿಧಾನ ಜಾರಿಯಾಗುವುದಕ್ಕೂ ಮುನ್ನ ಮಾಡಿಕೊಂಡಿದ್ದ ಒಪ್ಪಂದ, ಒಡಂಬಡಿಕೆಯಿಂದ ಉಂಟಾಗುವ ವಿವಾದಗಳನ್ನು ಪರಿಹರಿಸಲು ರಾಷ್ಟ್ರಪತಿಗಳು ಸುಪ್ರೀಂ ಕೋರ್ಟ್ ಸಲಹೆಗಳನ್ನು ಕೋರಬಹುದು. ಈ ವಿಷಯದಲ್ಲಿ ಸುಪ್ರೀಂ ಕೋರ್ಟ್, ತನ್ನ ಅಭಿಪ್ರಾಯವನ್ನು ರಾಷ್ಟ್ರಪತಿಗಳಿಗೆ ಸಲ್ಲಿಸುವುದು ಕಡ್ಡಾಯವಾಗಿರುತ್ತದೆ.
ಅಂದಹಾಗೆ, ರಾಷ್ಟ್ರಪತಿಗಳು ಸುಪ್ರೀಂ ಕೋರ್ಟ್ ವ್ಯಕ್ತಪಡಿಸಿದ ಅಭಿಪ್ರಾಯ ವನ್ನು ಸಲಹೆಯಾಗಿ ಸ್ವೀಕರಿಸಬಹುದು ಅಥವಾ ನಿರಾಕರಿಸ ಬಹುದು. ಸುಪ್ರೀಂ ಕೋರ್ಟ್ ವ್ಯಕ್ತಪಡಿಸುವ ಅಭಿಪ್ರಾಯವು ನ್ಯಾಯಾಂಗ ಘೋಷಣೆಯಾಗಿರುವುದಿಲ್ಲ. ಆದರೆ, ಸರಕಾರವು ನಿರ್ಧರಿಸಬೇಕಾದ ವಿಚಾರದ ಮೇಲೆ ಸರ್ವೋಚ್ಚ ನ್ಯಾಯಾಲಯದ ಈ ಅಭಿಪ್ರಾಯ ಪರಿಣಾಮ ಬೀರಲಿದೆ.
▪️ರಾಷ್ಟ್ರಪತಿಗಳ ಉಲ್ಲೇಖಕ್ಕೆ ಸಂಬಂಧಿಸಿದ ಪ್ರಮುಖ ಅಂಶಗಳು
▪️143ನೇ ವಿಧಿ:
ಕೇಂದ್ರ ಸಚಿವ ಸಂಪುಟ ಸಲಹೆ ಮೇರೆಗೆ ಯಾವುದೇ ಕಾನೂನು ಪ್ರಶ್ನೆ ಅಥವಾ ಸಾರ್ವಜನಿಕ ಪ್ರಾಮುಖ್ಯತೆ ಇರುವ ಸಂಗತಿಗೆ ಸಂಬಂಧಿಸಿದಂತೆ ರಾಷ್ಟ್ರಪತಿಗಳು ಸುಪ್ರೀಂ ಕೋರ್ಟ್ ಅಭಿಪ್ರಾಯ ಕೋರಬಹುದು.
▪️145 (3)ವಿಧಿ:
ಈ ವಿಧಿಯಡಿ ರಾಷ್ಟ್ರಪತಿಗಳು ಐವರು ನ್ಯಾಯಮೂರ್ತಿಗಳನ್ನು ಒಳಗೊಂಡ ಸಾಂವಿಧಾನಿಕ ಪೀಠಕ್ಕೆ ಮಾತ್ರ ಸಲಹೆಗಳನ್ನು ಕೋರಬಹುದು.
▪️ಭಾರತ ಸರಕಾರ ಕಾಯಿದೆ: 1935ರ ಅನ್ವಯ ಸಲಹಾ ಅಧಿಕಾರ ವ್ಯಾಪ್ತಿಯನ್ನು ವಿಸ್ತರಿಸಲಾಯಿತು. ಇದು ಗವರ್ನರ್ ಜನರಲ್ ಗಳು ತಮಗೆ ಮೂಡುವ ಕಾನೂನು ಪ್ರಶ್ನೆಗಳನ್ನು ಫೆಡರಲ್ ನ್ಯಾಯಾಲಯಕ್ಕೆ ಉಲ್ಲೇಖಿಸಲು ಅವಕಾಶ ಮಾಡಿಕೊಟ್ಟಿತು.
▪️ಈವರೆಗೆ ರಾಷ್ಟ್ರಪತಿಗಳು ಸಲಹೆ ಕೋರಿರುವ ಪ್ರಕರಣಗಳು ಇಂತಿವೆ: ದಿಲ್ಲಿ ಕಾನೂನು ಕಾಯಿದೆ ಪ್ರಕರಣ (1951), ಕೇರಳ ಶಿಕ್ಷಣ ವಿಧೇಯಕ (1958), ಬೆರುಬಾರಿ ಪ್ರಕರಣ (1960), ಕೇಶವ ಸಿಂಗ್ ಪ್ರಕರಣ (1965), ಅಧ್ಯಕ್ಷೀಯ ಚುನಾವಣಾ ಪ್ರಕರಣ (1974), ಮೂರನೇ ನ್ಯಾಯಾಧೀಶರ ಪ್ರಕರಣ (1998) ಸೇರಿ 15ಕ್ಕೂ ಅಧಿಕ ಪ್ರಕರಣಗಳಲ್ಲಿ ರಾಷ್ಟ್ರಪತಿಗಳು ಸುಪ್ರೀಂ ಕೋರ್ಟ್ ಸಲಹೆಗಳನ್ನು ಕೋರಿದ್ದಾರೆ.
ಸದ್ಯ ರಾಷ್ಟ್ರಪತಿಗಳು ಎತ್ತಿರುವ ಪ್ರಶ್ನೆಗಳು:
ವಿಧಿ 200 ಮತ್ತು 201ರ ಅಡಿಯಲ್ಲಿ ನ್ಯಾಯಾಲ ಯಗಳು ರಾಷ್ಟ್ರಪತಿ ಮತ್ತು ರಾಜ್ಯಪಾಲರಿಗೆ ಕಾಲಮಿತಿಯನ್ನು ವಿಧಿಸಬಹುದೇ. ಇದು ಕಲಂ 142ರ ಅಡಿಯಲ್ಲಿ ಸುಪ್ರೀಂ ಕೋರ್ಟ್ ಅಧಿಕಾರದ ವ್ಯಾಪ್ತಿಯನ್ನು ಪ್ರಶ್ನಿಸುತ್ತದೆ.
ವಿದೇಶಗಳಲ್ಲಿ ಕಾನೂನು
ಕಾನೂನು ಸಂಬಂಧ ನಿರ್ಣಯಗಳನ್ನು ಕೈಗೊಳ್ಳಲು ರಾಷ್ಟ್ರಪತಿಗಳು ಸುಪ್ರೀಂ ಕೋರ್ಟ್ ಅಭಿಪ್ರಾಯಗಳನ್ನು ಪಡೆಯಲು ಕೆನಡಾ ಸಂವಿಧಾನ ಅನುವು ಮಾಡಿಕೊಟ್ಟಿದೆ. ಅಮೆರಿಕ ಸಂವಿಧಾನವು ಕಾರ್ಯಾಂಗ ಮತ್ತು ನ್ಯಾಯಾಂಗ ಎರಡನ್ನೂ ಕಟ್ಟುನಿಟ್ಟಾಗಿ ಬೇರ್ಪಡಿಸುವ ಸಲುವಾಗಿ ಸರ್ವೋಚ್ಚ ನ್ಯಾಯಾಲಯಗಳಿಂದ ಕಾನೂನು ಸಲಹೆಗಳನ್ನು ಪಡೆಯುವುದಕ್ಕೆ ನಿರ್ಬಂಧ ವಿಧಿಸಿದೆ.