Home Insurance:ನಿಮಗಷ್ಟೇ ಅಲ್ಲ, ನಿಮ್ಮ ಮನೆಗೂ ಇರಲಿ ವಿಮೆ ರಕ್ಷೆ!
Home Insurance: ಮನೆ ಎನ್ನುವುದು ಭಾವನಾತ್ಮಕವಾದುದು. ಅದಕ್ಕೆ ಬೆಲೆ ಕಟ್ಟಲಾಗದು. ಆದರೆ ಯಾವುದೇ ಕಾರಣದಿಂದ ಮನೆಗೆ ಹಾನಿ ಸಂಭವಿಸಿದರೂ ಅದರ ಆರ್ಥಿಕ ನಷ್ಟಕ್ಕೆ ಪರಿಹಾರವಿದೆ. ಅದೆಂದರೆ ಗೃಹ ವಿಮೆ. ಇದು ಇತರ ಎಲ್ಲ ವಿಮೆಗಳಿಗಿಂತ ಅಗ್ಗವಾದುದು ಎನ್ನುವ ಸಂಗತಿ ಬಹಳಷ್ಟು ಮಂದಿಗೆ ತಿಳಿದಿಲ್ಲ. 20 ಲಕ್ಷ ರೂ. ಮೌಲ್ಯದ ವಿಮೆಗೆ ತಗಲುವ ವಾರ್ಷಿಕ ವೆಚ್ಚ 900 -1,200 ರೂ.ಗಳು ಮಾತ್ರ! ಈ ವಿಮೆ ನೀಡುವ ಸವಲತ್ತುಗಳನ್ನು ಗಣನೆಗೆ ತೆಗೆದುಕೊಂಡರೆ ಇದರ ವಾರ್ಷಿಕ ಪ್ರೀಮಿಯಂ ಮೊತ್ತ ಕಡಿಮೆಯೇ. ಆದರೆ, 20 ಮಂದಿ ಮನೆಮಾಲೀಕರಲ್ಲಿ ಒಬ್ಬರು ಮಾತ್ರ ‘ಗೃಹ ವಿಮೆ’ ಮಾಡಿಸುತ್ತಿದ್ದಾರೆ! ನೀವು ಈ ವಿಷಯದಲ್ಲಿ ಜಾಣರಾಗಿರಿ!
ಈಗಾಗಲೇ ಮಳೆಗಾಲ ಶುರುವಾಗಿದೆ. ಮಳೆಯ ಅಬ್ಬರಕ್ಕೆ ಪ್ರವಾಹ, ಗುಡ್ಡ ಕುಸಿತಗಳು ಸಾಮಾನ್ಯ. ಇದರಿಂದ ಸಾಕಷ್ಟು ಮನೆಗಳಿಗೆ ಹಾನಿ ತಪ್ಪಿದ್ದಲ್ಲ. ಬಹಳ ಕನಸುಗಳನ್ನು ಹೊತ್ತು, ಅಪಾರ ಹಣ ಖರ್ಚು ಮಾಡಿ ಕಟ್ಟಿದ ಮನೆ ಪ್ರಕೃತಿ ವಿಕೋಪದಿಂದ ಇಲ್ಲವಾಗಬಹುದು! ಮನೆ ಕುಸಿತವೆಂದರೆ, ಕೇವಲ ಕಟ್ಟಡ ಕುಸಿತ ಎಂದರ್ಥವಲ್ಲ. ಮನೆ ಅನ್ನುವುದು ಭಾವನಾತ್ಮಕ ಮತ್ತು ಆರ್ಥಿಕ ಆಯಾಮವನ್ನೂ ಹೊಂದಿದೆ. ಪ್ರಕೃತಿ ವಿಕೋಪ ಮತ್ತು ಅದರಿಂದ ನಿಮ್ಮ ಮನೆಗೆ ಆಗಬಹುದಾದ ಅನಾಹುತವನ್ನಂತೂ ತಪ್ಪಿಸಲಾಗದು. ಆದರೆ, ಮನೆ ಕಳೆದುಕೊಂಡು ಆರ್ಥಿಕವಾಗಿ ಸಂಕಷ್ಟಕ್ಕೆ ಸಿಲುಕುವ ಪರಿಸ್ಥಿತಿಯಿಂದ ಪಾರಾಗಲು ‘ಕಟ್ಟಡ ವಿಮೆ’ ನೆರವಾಗುತ್ತದೆ. ಮನೆ ಸೇರಿದಂತೆ ಕಟ್ಟಡಗಳಿಗೂ ವಿಮೆ ಮಾಡಿಸಬಹುದು ಮತ್ತು ಅವುಗಳ ಪ್ರೀಮಿಯಂ ಬಹಳ ಕಡಿಮೆ ಇದೆ ಎನ್ನುವುದು ಬಹುತೇಕರಿಗೆ ಗೊತ್ತಿಲ್ಲ. ಕಟ್ಟಡವನ್ನು ಹೊರತುಪಡಿಸಿ, ಮನೆಯೊಳಗಿನ ವಸ್ತುಗಳಿಗೂ ರಕ್ಷಣೆ ಒದಗಿಸುವ ವಿಮೆ ಯೋಜನೆಗಳಿವೆ.
ಮಹಾನಗರವೊಂದರ ನಿವಾಸಿ ವೆಂಕಟೇಶ್ ಮೂರ್ತಿ ಪಾಲಿಗೆ ಕಳೆದ ಸಲದ ದೀಪಾವಳಿ, ಬೆಳಕಿನ ಬದಲಿಗೆ ಕತ್ತಲೆಯನ್ನೇ ತಂದಿತು. ಕಳೆದ ದೀಪಾವಳಿ ಹಬ್ಬಕ್ಕೆ ಮನೆಗೆ ನೆಂಟರು ಬಂದಿದ್ದರು. ಸಂಭ್ರಮದಲ್ಲಿದ್ದ ವೆಂಕಟೇಶ್ ಮೂರ್ತಿ ಅವರು ಹಬ್ಬದ ದಿನದ ಆ ರಾತ್ರಿ 20 ಲಕ್ಷ ರೂ.ಗಳನ್ನು ಕಳೆದುಕೊಂಡರು! ಪಕ್ಕದ ಮನೆಯವರು ಬಿಟ್ಟ ರಾಕೆಟ್ ಪಟಾಕಿಯೊಂದು ಗುರಿತಪ್ಪಿ ವೆಂಕಟೇಶ್ ಮೂರ್ತಿಯವರು ವಾಸಿಸುತ್ತಿದ್ದ 8ನೇ ಮಹಡಿಯ ಮನೆಯೊಳಗೆ ಬಿತ್ತು. ಅದರಿಂದ ಹೊತ್ತಿಕೊಂಡ ಬೆಂಕಿ ಮನೆಯಲ್ಲಿದ್ದ ಪೀಠೋಪಕರಣ, ಎಲೆಕ್ಟ್ರಾನಿಕ್ಸ್ ವಸ್ತುಗಳು, ಬಟ್ಟೆಬರೆ ಯಾವುದನ್ನೂ ಬಿಡದಂತೆ ಬೂದಿಯಾಗಿಸಿತು. ಅದೃಷ್ಟವಶಾತ್ ಅವರ ಕುಟುಂಬಸ್ಥರು ಅಪಾಯದಿಂದ ಪಾರಾದರು. ಆದರೆ ಮನೆಯಲ್ಲಿದ್ದ ಬೆಲೆಬಾಳುವ ವಸ್ತುಗಳೆಲ್ಲವೂ ಉರಿದುಹೋದವು.
ಗುಡ್ಡ ಕುಸಿದು ಅನೇಕರು ತಮ್ಮ ಮನೆಗಳನ್ನು ಕಳೆದುಕೊಳ್ಳುವ ಸುದ್ದಿಗಳನ್ನು ನಾವು ಆಗಾಗ ಓದುತ್ತಿರುತ್ತೇವೆ. ಜೀವಿತಾವಧಿಯ ಎಲ್ಲ ಸಂಪಾದನೆಯನ್ನೂ ಸುರಿದು ಕೆಲವರು ಮನೆ ಕಟ್ಟಿರುತ್ತಾರೆ. ಒಂದು ಅಬ್ಬರದ ಮಳೆ ಜನರ ಬದುಕನ್ನೇ ಆರ್ಥಿಕವಾಗಿ ನುಂಗಬಹುದು. ಮನೆಯಂತೂ ಹೋಯಿತು. ಆರ್ಥಿಕ ನಷ್ಟವನ್ನು ಭರಿಸಬಹುದಾ?
ಮನೆ ಎನ್ನುವುದು ಭಾವನಾತ್ಮಕವಾದುದು. ಅದಕ್ಕೆ ಬೆಲೆ ಕಟ್ಟಲಾಗದು. ಆದರೆ ಯಾವುದೇ ಕಾರಣದಿಂದ ಮನೆಗೆ ಹಾನಿ ಸಂಭವಿಸಿದರೂ ಅದರ ಆರ್ಥಿಕ ನಷ್ಟಕ್ಕೆ ಪರಿಹಾರವಿದೆ. ಅದೆಂದರೆ ಗೃಹ ವಿಮೆ. ಇದು ಇತರ ಎಲ್ಲಾ ವಿಮೆಗಳಿಗಿಂತ ಅಗ್ಗವಾದುದು ಎನ್ನುವ ಸಂಗತಿ ಬಹಳಷ್ಟು ಮಂದಿಗೆ ತಿಳಿದಿಲ್ಲ. 20 ಲಕ್ಷ ರೂ. ಮೌಲ್ಯದ ವಿಮೆಗೆ ತಗಲುವ ವಾರ್ಷಿಕ ವೆಚ್ಚ 900 – 1,200 ರೂ.ಗಳು ಮಾತ್ರ! ಈ ವಿಮೆ ನೀಡುವ ಸವಲತ್ತುಗಳನ್ನು ಗಣನೆಗೆ ತೆಗೆದುಕೊಂಡರೆ ಇದರ ವಾರ್ಷಿಕ ಪ್ರೀಮಿಯಂ ಮೊತ್ತ ಕಡಿಮೆಯೇ. ಆದರೆ, 20 ಮನೆಮಾಲೀಕರಲ್ಲಿ ಒಬ್ಬರು ಮಾತ್ರ ಮನೆ ವಿಮೆ ಮಾಡಿಸುತ್ತಿದ್ದಾರೆ!
ಜನರು ತಮ್ಮ ಉಳಿತಾಯದ ಹಣವನ್ನು ಮನೆಯ ನಿರ್ಮಾಣಕ್ಕೆ ಹೂಡಿಕೆ ಮಾಡುತ್ತಾರೆ. ಆದರೆ ಮನೆ ಎನ್ನುವ ಹೂಡಿಕೆಯ ರಕ್ಷಣೆಗೆ ಹೆಚ್ಚಿನವರು ಯಾವುದೇ ಮಾರ್ಗೋಪಾಯ ಕೈಗೊಳ್ಳುತ್ತಿಲ್ಲ ಎನ್ನುತ್ತಾರೆ ಮಾರುಕಟ್ಟೆಯ ಪರಿಣತರು. ಅದಕ್ಕೆ ಕಾರಣ ಮನೆಗೆ ಅವಘಡ ಸಂಭವಿಸುವ ಸಾಧ್ಯತೆ ಕಡಿಮೆ ಎನ್ನುವ ಮನೋಭಾವ. ಮನೆಯ ಅವಘಡ ಸಂಭವಿಸುವ ಸಾಧ್ಯತೆ ಕಡಿಮೆಯೇನೋ ಇರಬಹುದು, ಆದರೆ, ಸಂಭವಿಸಿದಾಗ ಆಗುವ ಅನಾಹುತ ಮಾತ್ರ ಅಪಾರವಾದುದು.
ಪ್ರಕೃತಿಯೇ ಒಳ್ಳೆ ಸೇಲ್ಸ್ ಮ್ಯಾನ್:
ವಿಮೆಯನ್ನು ಜನರ ಬಳಿಗೆ ತಲುಪಿಸುವ ಸೇಲ್‌ಮ್ಯಾನ್‌ಗಿಂತ, ಪ್ರಕೃತಿಯೇ ಉತ್ತಮವಾಗಿ ಸೇಲ್ಸ್‌ಮ್ಯಾನ್ ಹುದ್ದೆಯನ್ನು ನಿಭಾಯಿಸುತ್ತಿದೆ. ಪ್ರತಿ ಬಾರಿ ಪ್ರಾಕೃತಿಕ ವಿಕೋಪಗಳು ಸಂಭವಿಸಿದಾಗ ಮನೆಗೆ ವಿಮೆ ಮಾಡಿಸುವವರ ಸಂಖ್ಯೆ ಗಣನೀಯ ಪ್ರಮಾಣದಲ್ಲಿ ಹೆಚ್ಚುತ್ತದೆ. 2018ರ ಅಗಸ್ಟ್‌ನಲ್ಲಿ ಕೇರಳ ಭೀಕರ ಪ್ರವಾಹದಿಂದ ತತ್ತರಿಸಿತ್ತು. ಮುಂದಿನ ವರ್ಷ ಆಗ್ನಿ ಮತ್ತಿತರ ಹಾನಿಯಿಂದ ರಕ್ಷಣೆ ನೀಡುವ ವಿಮೆ ಪಾಲಿಸಿಗಳನ್ನು ಖರೀದಿಸುವವ ಸಂಖ್ಯೆ ಶೇ.34ರಷ್ಟು ಏರಿಕೆ ಕಂಡಿತ್ತು,
2020ರ ಮೇನಲ್ಲಿ ಅಂಥಾನ್ ಚಂಡಮಾರುತ ಪಶ್ಚಿಮ ಬಂಗಾಳ ರಾಜ್ಯಾದ್ಯಂತ ಹಾವಳಿಯೆಬ್ಬಿಸಿತ್ತು. 2021ರಲ್ಲಿ ಗೃಹ ವಿಮೆ ಪಾಲಿಸಿದಾರರ ಸಂಖ್ಯೆಯಲ್ಲಿ ಶೇ.27ರಷ್ಟು ಹೆಚ್ಚಳವಾಗಿತ್ತು. ಆದರೆ ಪ್ರಾಕೃತಿಕ ವಿಕೋಪಗಳ ನೆನಪು ಮಾಸುತ್ತಲೇ ಮತ್ತೆ ಗೃಹ ವಿಮೆಯತ್ತ ಜನರ ನಿರ್ಲಕ್ಷ್ಯವೂ ಹೆಚ್ಚುವ ಪರಿಸ್ಥಿತಿಯಿದೆ.
ಮನುಷ್ಯ ಸೃಷ್ಟಿಸುವ ಅವಘಡ:
ಭೂಕಂಪ, ಚಂಡಮಾರುತ, ಪ್ರವಾಹ ಮತ್ತಿತರ ಪ್ರಾಕೃತಿಕ ವಿಕೋಪಗಳು ಮಾತ್ರವೇ ಮನೆಯ ಹಾನಿಗೆ ಕಾರಣವಾಗುತ್ತಿಲ್ಲ. ಬಹುಮಹಡಿ ಕಟ್ಟಡಗಳ ನಿರ್ಮಾಣ ಹೆಚ್ಚುತ್ತಿರುವುದರಿಂದ ಅವಘಡಗಳ ಪ್ರಮಾಣವೂ ಏರಿಕೆ ಕಾಣುತ್ತಿದೆ. ಮುಂಬಯಿನಲ್ಲಿ ಪ್ರತಿವರ್ಷ 5000 ಅಗ್ನಿ ಅವಘಡ ಪ್ರಕರಣಗಳು ವರದಿಯಾಗುತ್ತದೆ. ಬೆಂಗಳೂರು ಮತ್ತು ಹೊಸದಿಲ್ಲಿಯಲ್ಲಿ 2500 ಅಗ್ನಿ ಅವಘಡ ಪ್ರಕರಣಗಳು ದಾಖಲಾಗುತ್ತವೆ.
ಪ್ರಾರಂಭದಲ್ಲಿ ಗೃಹ ವಿಮೆ:
ಮೂರು ವರ್ಷಗಳ ಹಿಂದೆ ಜನರಲ್ ವಿಮಾ ಸಂಸ್ಥೆಗಳು ಕಡ್ಡಾಯವಾಗಿ ‘ಗೃಹ ವಿಮೆ’ಯನ್ನು ಒದಗಿಸಬೇಕು ಎನ್ನುವ ಸೂಚನೆಯನ್ನು ವಿಮಾ ನಿಯಂತ್ರಕ ಸಂಸ್ಥೆ ಹೊರಡಿಸಿತು. ಅದರಂತೆ ಎಲ್ಲಾ ವಿಮಾಸಂಸ್ಥೆಗಳು ‘ಭಾರತ್ ಗೃಹ ರಕ್ಷಾ ‘(ಬಿಜಿಆರ್) ಪಾಲಿಸಿ ಹೊರತಂದವು. ಪ್ರಾಕೃತಿಕ ವಿಕೋಪಗಳು, ಅಗ್ನಿ ಅವಘಡ, ಸ್ಫೋಟ ಮತ್ತಿತರ ಬಾಹ್ಯ ಶಕ್ತಿಗಳಿಂದ (ಮನೆ ಮೇಲೆ ಮರ ಉರುಳಿ ಬೀಳುವುದು, ವಾಹನಗಳಿಂದ ಮನೆಗೆ ಡಿಕ್ಕಿ ಹಾಗೂ ಇತ್ಯಾದಿ) ಉಂಟಾಗುವ ಹಾನಿಗಳಿಂದಲೂ ಈ ವಿಮೆ ರಕ್ಷಣೆ ಒದಗಿಸುತ್ತಿತ್ತು. ಆದರೆ ಈ ಪಾಲಿಸಿ 10 ಲಕ್ಷ ರೂ. ವರೆಗೆ ಅಥವಾ ವಿಮೆಯ ಶೇ.20ರಷ್ಟು ಕವರೇಜ್ ವ್ಯಾಪ್ತಿಯನ್ನು ಮಾತ್ರವೇ ಒದಗಿಸುತ್ತಿತ್ತು. ಮಧ್ಯಮವರ್ಗದವರ ಮನೆಯ ರಕ್ಷಣೆಗೆ ಈ ಮೊತ್ತ ಸಾಲುವುದಿಲ್ಲ. ಮನೆಯಲ್ಲಿ ಬೆಲೆಬಾಳುವ ವಸ್ತುಗಳನ್ನು ಇಟ್ಟಿದ್ದರೆ, ವಸ್ತುಗಳ ರಕ್ಷಣೆಗೆ ಹೆಚ್ಚುವರಿ ವಿಮೆಯನ್ನು ಮಾಡಿಸುವುದು ಸೂಕ್ತ.
ಪುನರ್‌ನಿರ್ಮಾಣದ ಖರ್ಚು ವೆಚ್ಚ:
ಸಾಮಾನ್ಯವಾಗಿ ಗೃಹ ವಿಮೆಯನ್ನು ಮಾಡಿಸುವಾಗ ಪ್ರಾಪರ್ಟಿ ಮೌಲ್ಯವನ್ನು ಆಧರಿಸಿ ಮಾಡಿಸುತ್ತಾರೆ. ಇದು ಬಹುತೇಕರು ಮಾಡುವ ತಪ್ಪು. ಕೇವಲ ಮನೆಯ ರಚನೆಯ ಮೌಲ್ಯಕ್ಕೆ ಮಾತ್ರವೇ ವಿಮೆ ಮಾಡಿಸಬೇಕು. ಗೃಹ ವಿಮೆ ಮಾಡಿಸುವವೇಳೆ ಪುನರ್ ನಿರ್ಮಾಣದ ಖರ್ಚನ್ನೂ ಗಣನೆಗೆ ತೆಗೆದುಕೊಳ್ಳಬೇಕು. ಆದರೆ ಬಹುತೇಕರು ಗೃಹ ವಿಮೆ ಮಾಡಿಸುವ ಸಂದರ್ಭದಲ್ಲಿ ತಾವು ಮನೆಯ ಮೇಲೆ ತೆಗೆದುಕೊಂಡ ಸಾಲದ ಮೊತ್ತಕ್ಕೆ ಅನುಗುಣವಾಗಿ ಮಾಡಿಸುತ್ತಾರೆ. ಸಾಧಾರಣ ಮನೆಯನ್ನು ಪುನರ್ ನಿರ್ಮಿಸಲು ತಗುಲುವ ಖರ್ಚು ಪ್ರತಿ ಚದರಕ್ಕೆ 1200- 1500 ರೂ.ಗಳು. ಮನೆಯಲ್ಲಿ ಉತ್ಕೃಷ್ಟ ಗುಣಮಟ್ಟದ ವಸ್ತುಗಳನ್ನು ಬಳಸಿದ್ದರೆ ಪ್ರತಿ ಚದರಕ್ಕೆ 3500- 4000 ರೂ.ಗಳ ತನಕವೂ ಬೆಲೆಯಿದೆ.
ಒಂದೇ ಬಾರಿಗೆ ಬಹು ವರ್ಷಗಳ ವಿಮೆಯನ್ನು ಮಾಡಿಸುವುದು ಉತ್ತಮ. ಇದರಿಂದ ವರ್ಷ ವರ್ಷ ಪುನರ್‌ನವೀಕರಣ ಮಾಡುವುದು ತಪ್ಪುತ್ತದೆ. ಜೊತೆಗೆ ಹೆಚ್ಚುವರಿ ಶುಲ್ಕವೂ ತಪ್ಪುತ್ತದೆ. ಪ್ರತಿ ವರ್ಷ ವಿಮಾ ಪಾಲಿಸಿಗಳ ಪ್ರೀಮಿಯಂ ಶೇ.10ರಷ್ಟು ಏರಿಕೆ ಕಾಣುತ್ತದೆ. ಹೀಗಾಗಿ ಒಂದೇ ಬಾರಿಗೆ ಬಹುವರ್ಷಗಳ ಅವಧಿಗೆ ವಿಮಾ ಪಾಲಿಸಿ ಖರೀದಿಸಿದರೆ ಅಷ್ಟು ವರ್ಷಗಳ ಕಾಲ ಅದರ ಪ್ರೀಮಿಯಂ ಮೊತ್ತ ಲಾಕ್ ಆಗುತ್ತದೆ.
ಮೌಲ್ಯಮಾಪನದ ಅಗತ್ಯ:
ಗೃಹ ವಿಮೆಯ ಸಂದರ್ಭದಲ್ಲಿ ಮನೆಯಲ್ಲಿನ ವಸ್ತುಗಳನ್ನೂ ಪಟ್ಟಿ ಮಾಡಬೇಕಾಗುತ್ತದೆ. ಆಗ ಪ್ರತಿ ವಸ್ತುಗಳನ್ನು ಪಟ್ಟಿ ಮಾಡಿ ಅದರ ತಯಾರಿಕಾ ದಿನಾಂಕ, ಮಾಡೆಲ್ ಮತ್ತು ಅದರಲ್ಲಿನ ವಿಶಿಷ್ಟ ಗುರುತಿನ ಸಂಖ್ಯೆಯನ್ನೂ ನಮೂದಿಸಬೇಕು. ವಿಮಾ ಸಂಸ್ಥೆಗಳು ಮನೆಯಲ್ಲಿನ ವಸ್ತುಗಳ ಮೌಲ್ಯವನ್ನು ಲೆಕ್ಕಾಚಾರ ಮಾಡುವಾಗ ಕೆಲ ನಿಯಮಗಳಿವೆ. ಉದಾಹರಣೆಗೆ ಎರಡು ವರ್ಷಗಳ ಹಿಂದೆ ಒಂದು ಎಲೆಕ್ಟ್ರಾನಿಕ್ ಉಪಕರಣವನ್ನು 50,000 ರೂ. ನೀಡಿ ಖರೀದಿಸಿದ್ದರೆ, ಈಗ ಅದರ ಮೌಲ್ಯ 20,000- 22,000 ರೂಪಾಯಿ ಆಗುತ್ತದೆ. ವಿಮಾ ಪಾಲಿಸಿಯನ್ನು ನವೀಕರಿಸುವ ಸಂದರ್ಭದಲ್ಲಿ ಪಟ್ಟಿಯಲ್ಲಿನ ವಸ್ತುಗಳ ಮೌಲ್ಯವನ್ನು ಸರಿಯಾಗಿ ನಮೂದಿಸಬೇಕಾಗುತ್ತದೆ. ಕೆಲವಸ್ತುಗಳು ನವೀಕರಣದ ಸಮಯದಲ್ಲಿ ಪಾಲಿಸಿದಾರರ ಬಳಿ ಇಲ್ಲದೇ ಇರಬಹುದು ಮತ್ತು ಹೊಸ ವಸ್ತುಗಳನ್ನು ಖರೀದಿಸಿರುವ ಸಾಧ್ಯತೆಯೂ ಇರುತ್ತದೆ. ವಸ್ತುಗಳ ಒಟ್ಟಾರೆ ಮೌಲ್ಯವು ವಿಮೆಯ ಕವರ್ ಮೊತ್ತದ ಒಳಗಿದ್ದರೆ ಪ್ರೀಮಿಯಂನಲ್ಲಿ ಬದಲಾವಣೆ ಇರುವುದಿಲ್ಲ.
ಮುಂಬಯಿನಲ್ಲಿ ಪ್ರತಿವರ್ಷ 5000, ಬೆಂಗಳೂರು ಮತ್ತು ಹೊಸದಿಲ್ಲಿಯಲ್ಲಿ 2500 ಅಗ್ನಿ ಅವಘಡ ಪ್ರಕರಣಗಳು ದಾಖಲಾಗುತ್ತವೆ. ಆದರೂ, ಜನರಲ್ಲಿಲ್ಲ ವಿಮೆ ಜಾಗೃತಿ.
ಗೃಹ ವಿಮೆ ಏನನ್ನು ಕವರ್ ಮಾಡುವುದಿಲ್ಲ?
▪️ಮನೆ ಮಾಲೀಕನೇ ಉದ್ದೇಶಪೂರ್ವಕವಾಗಿ ತನ್ನ ಮನೆಗೆ ಹಾನಿಯುಂಟು ಮಾಡಿದಾಗ
▪️ಮನೆಯಲ್ಲಿನ ವಸ್ತುಗಳಿಗೆ ವಿಮೆ ಮಾಡಿಸಿದಾಗ ವಸ್ತುಗಳು ಮನೆಯೊಳಗಿದ್ದರೆ ಮಾತ್ರ, ಅವಕ್ಕೆ ಹಾನಿ ಸಂಭವಿಸಿದಾಗ ಕ್ರೈಮ್ ಮಾಡಿಕೊಳ್ಳಬಹುದು. ಮನೆಯ ವಸ್ತುಗಳು ವಿಮೆಯಲ್ಲಿ ನಮೂದಿಸಲ್ಪಟ್ಟ ಪ್ರದೇಶದಿಂದ ಹೊರಗಿದ್ದಲ್ಲಿ ಪಾಲಿಸಿದಾರನಿಗೆ ಪರಿಹಾರ ಮೊತ್ತ ಪಾವತಿಯಾಗದು.
▪️ಮನೆಯು ರೆಸಿಡೆನ್ಸಿಯಲ್ ಅಥವಾ ಕಮರ್ಷಿಯಲ್ಲೋ ಎನ್ನುವುದೂ ತುಂಬಾ ಮುಖ್ಯವಾಗುತ್ತದೆ. ಮನೆಯನ್ನು ಹಾಲಿಡೇ ರೆಂಟಲ್ ಸಂಸ್ಥೆಗೆ ಲೀಸ್‌ಗೆ ಕೊಟ್ಟಲ್ಲಿ ಆ ಸಂದರ್ಭದಲ್ಲಿ ಮನೆಯನ್ನು ‘ಕಮರ್ಷಿಯಲ್’ ಎಂದು ಪರಿಗಣಿತವಾಗುತ್ತದೆ.
▪️ಹಾನಿಗೊಳಪಟ್ಟ ಮನೆ ನಿರ್ಮಾಣದಲ್ಲಿ ಕಳಪೆ ಸಾಮಗ್ರಿಯನ್ನು ಬಳಸಿರುವುದು ಕಂಡುಬಂದಲ್ಲಿ ಆ ಮನೆಗೆ ಗೃಹ ವಿಮೆಯ ಪರಿಹಾರ ದೊರಕದು.
▪️ಸರಕಾರಿ ಸಂಸ್ಥೆಗಳು ಇಲ್ಲವೇ ಸೂಚನೆಯ ಮೇರೆಗೆ ಕಟ್ಟಡ, ಮನೆಯನ್ನು ಹಾನಿಗೊಳಪಡಿಸಿದ ಪಕ್ಷದಲ್ಲಿ ವಿಮೆ ಕಂಪನಿಯು ಆ ನಷ್ಟವನ್ನು ಭರಿಸದು.
▪️₹90-1200- 20 ಲಕ್ಷ ರೂ. ಮೌಲ್ಯದ ವಿಮೆಗೆ ತಗಲುವ ವಾರ್ಷಿಕ ವೆಚ್ಚ.
▪️ಬಾಡಿಗೆದಾರರಿಗೂ ಬೇಕು:
ಬಾಡಿಗೆ ಮನೆಯಲ್ಲಿ ವಾಸಿಸುವವರು ತಮಗೆ ಗೃಹವಿಮೆ ಬೇಡ ಎಂದುಕೊಳ್ಳುತ್ತಾರೆ. ಆದರೆ, ಇದು ತಪ್ಪು ಕಲ್ಪನೆ. “ಬಾಡಿಗೆ ಮನೆಗೆ ಏನೇ ಹಾನಿ ಸಂಭವಿಸಿದರೂ ಅದನ್ನು ಮಾಲೀಕನೇ ಭರಿಸಬೇಕಾಗುತ್ತದೆ,” ಎನ್ನುವ ಯೋಚನೆಯಿಂದ ಬಾಡಿಗೆದಾರರು ನಿಶ್ಚಿಂತೆಯಿಂದ ಇರುತ್ತಾರೆ. ಆದರೆ, ಮನೆ ಇನ್ನೊಬ್ಬರಿಗೆ ಸೇರಿದ್ದರೂ, ಅದರೊಳಗಿನ ವಸ್ತುಗಳು ತಮ್ಮವು ಎನ್ನುವುದನ್ನು ಬಾಡಿಗೆದಾರರು ಮರೆತುಬಿಡುತ್ತಾರೆ. ಈ ವಸ್ತುಗಳ ಹಾನಿ (ಪ್ರಾಕೃತಿಕ ಅಥವಾ ಮನುಷ್ಯ ನಿರ್ಮಿತ) ಮತ್ತು ಕಳ್ಳತನ ಎರಡನ್ನೂ ಕವರ್ ಮಾಡುವ ವಿಮೆಯನ್ನು ಮಾಡಿಸುವುದು ಜಾಣೆಯ ಆಯ್ಕೆ.
▪️ಕಲಾಕೃತಿಗಳಿಗೂ ಇದೆ ವಿಮೆ:
ಕಲಾಕೃತಿಗಳಿಗೆ ವಿಮಾ ರಕ್ಷಣೆ ಒದಗಿಸಬೇಕೆಂದರೆ ಅದಕ್ಕೆ ಬೇರೆಯದೇ ಮಾರ್ಗವನ್ನು ಪಾಲಿಸಿದಾರರು ಅನುಸರಿಸಬೇಕು. ಮೊದಲು ತಮ್ಮ ಬಳಿಯಿರುವ ಕಲಾಕೃತಿಗಳ ಮೌಲ್ಯವನ್ನು ಅಧಿಕೃತ ಸಂಸ್ಥೆಯಿಂದ ಪ್ರಮಾಣಿಕೃತಗೊಳಿಸಿ, ಪ್ರಮಾಣಪತ್ರವನ್ನು ವಿಮಾಸಂಸ್ಥೆಗೆ ಒದಗಿಸಬೇಕು. ಕಲಾಕೃತಿಯ ಮೌಲ್ಯ 1 ಲಕ್ಷರೂ. ಗಿಂತ ಕೆಳಗಿದ್ದರೆ ಪ್ರಮಾಣಪತ್ರ ಒದಗಿಸುವ ಅಗತ್ಯವಿಲ್ಲ. ಇಲ್ಲವೇ, ಒಂದಕ್ಕಿಂತ ಹೆಚ್ಚು ಕಲಾಕೃತಿಗಳಿದ್ದಲ್ಲಿ ಅವುಗಳ ಒಟ್ಟು ಮೌಲ್ಯ 5 ಲಕ್ಷರೂ. ಮೀರಿದ್ದರೂ ಪ್ರಮಾಣಪತ್ರ ಸಲ್ಲಿಸುವ ಅಗತ್ಯವಿಲ್ಲ.
▪️ಗೃಹ ವಿಮೆಗಳಲ್ಲಿ ಎಷ್ಟು ವಿಧ?
▪️ಕಟ್ಟಡದ ಹಾನಿಗೆ ವಿಮೆ:
ಕಟ್ಟಡದ ರಚನೆಗೆ ಭೂಕಂಪ, ಸಿಡಿಲು, ಬಿರುಗಾಳಿ, ಪ್ರವಾಹ ಮತ್ತಿತರ ಪ್ರಾಕೃತಿಕ ವಿಕೋಪಗಳಿಂದ ಹಾನಿಯಾದಲ್ಲಿ, ಅಥವಾ ಮನುಷ್ಯರಿಂದ ಉಂಟಾಗುವ ಅಗ್ನಿ ಅವಘಡ, ಗಲಭೆ ಮತ್ತಿತರ ಅನಾಹುತಗಳಿಂದ ರಕ್ಷಣೆ ದೊರೆಯುತ್ತದೆ. ಈ ಮೇಲೆ ಸೂಚಿಸಲಾದ ಅವಘಡಗಳ ಸಂದರ್ಭದಲ್ಲಿ ರಿಪೇರಿ ಖರ್ಚು ಮತ್ತು ಹಾನಿಗೊಳಗಾದ ಪ್ರಾಪರ್ಟಿಯ ಪುನರ್ ನಿರ್ಮಾಣದ ಖರ್ಚನ್ನು ವಿಮೆ ಭರಿಸುತ್ತದೆ.
ವಿಮೆಯ ಬೆಲೆ: ಪ್ರತಿ 1 ಲಕ್ಷ ಕವರ್ ಗೆ 15- 30 ರೂ.
2. ಮನೆಯೊಳಗಿನ ವಸ್ತುಗಳ ಹಾನಿಗೆ ವಿಮೆ:
ಕಟ್ಟಡವನ್ನು ಹೊರತುಪಡಿಸಿ, ಮನೆಯೊಳಗಿನ ವಸ್ತುಗಳಿಗೂ ರಕ್ಷಣೆ ಒದಗಿಸುವ ಈ ವಿಮೆಯ ಪ್ರೀಮಿಯಂ ಕೊಂಚ ದುಬಾರಿ. ಕಟ್ಟಡ ಮತ್ತು ಒಳಗಿನ ವಸ್ತುಗಳಿಗೆ ಒಂದೇ ರೇಟ್ ವಿಧಿಸುವ ಸಂಸ್ಥೆಗಳೂ ಇವೆ.
▪️ವಿಮೆಯ ಬೆಲೆ: ಪ್ರತಿ 1 ಲಕ್ಷಕವರ್‌ ಗೆ 30-50 ರೂ.
3. ಕಳ್ಳತನವಾದರೂ ವಿಮೆ:
ಮನೆಯೊಳಗಿನ ವಸ್ತುಗಳ ಕಳ್ಳತನವಾದಾಗ ಅದರ ಹಾನಿ ಭರಿಸುವ ವಿಮೆಗಳೂ ಮಾರುಕಟ್ಟೆಯಲ್ಲಿ ಲಭ್ಯ ಇವೆ. ಇದರಡಿ ಮನೆಯಲ್ಲಿನ ಪೀಠೋಪಕರಣಗಳು, ಕಲಾಕೃತಿಗಳು, ಬಟ್ಟೆಬರೆ, ಎಲೆಕ್ಟ್ರಾನಿಕ್ ಉಪಕರಣಗಳ ಕಳ್ಳತನವು ವಿಮೆಯಡಿ ಕವರ್ ಆಗುತ್ತವೆ.
▪️ವಿಮೆಯ ಬೆಲೆ: ಪ್ರತಿ 1 ಲಕ್ಷಕವರ್ಗೆಗೆ 125- 200 ರೂ.
ಉಪಯುಕ್ತ ಈ ವಿಮೆಗಳ ಬಗ್ಗೆ ನಿಮಗೆ ಗೊತ್ತಾ?
◾ಉಪಕರಣ ಕೆಟ್ಟರೆ ವಿಮೆ ರಕ್ಷೆ:
ಮನೆಯಲ್ಲಿನ ಎಲೆಕ್ಟ್ರಾನಿಕ್ಸ್ ವಸ್ತುಗಳು ಕೆಟ್ಟರೂ ಅದರ ನಷ್ಟ ಭರಿಸುವ ವಿಮೆಗಳೂ ಇವೆ. ಪಾಲಿಸಿದಾರ ಮತ್ತು ಸಂಸ್ಥೆ ಇಬ್ಬರೂ ಕುಳಿತು ಅದರ ಕವರೇಜ್ ಮೊತ್ತವನ್ನು ನಿಗದಿಪಡಿಸಿಕೊಳ್ಳಬಹುದು.
▪️ವಿಮೆಯ ಬೆಲೆ: ಪ್ರತಿ 1 ಲಕ್ಷಕವಗೆರ್‌ಗೆ 200- 300 ರೂ.
2. ಇಎಂಐ ರಕ್ಷಣೆ:
ಮನೆ ಮಾಲೀಕ ಹಾನಿಗೊಳಗಾದ ಪ್ರಾಪರ್ಟಿಯ ಮೇಲೆ ಸಾಲ ಮಾಡಿದ್ದಲ್ಲಿ, ಆ ಪ್ರಾಪರ್ಟಿ ಪುನರ್ ನಿರ್ಮಾಣವಾಗುವ ನಿಗದಿತ ಸಮಯದವರೆಗೆ ವಿಮಾ ಸಂಸ್ಥೆಯು ಸಾಲದ ಇಎಂಐ ಪಾವತಿಸಲಿದೆ. ಈ ಬಗೆಯ ವಿಮೆ ಇಎಂಐ ರಕ್ಷಣೆ ವಿಭಾಗದಡಿ ಬರುತ್ತದೆ.
▪️ವಿಮೆಯ ಬೆಲೆ: 6 ತಿಂಗಳ ಇಎಂಐಗೆ 2500 ರೂ.
3.ಬದಲಿ ವಾಸದ ವ್ಯವಸ್ಥೆ:
ಮನೆಗೆ ಹಾನಿ ತಗುಲಿ ಮನೆ ಬಾಡಿಗೆದಾರ ಬೇರೆ ಕಡೆ ವಾಸ್ತವ್ಯ ಬದಲಾಯಿಸಿದಾಗ, ಹೊಸ ಮನೆಯ ಬಾಡಿಗೆ ಮುಂಚಿನ ಬಾಡಿಗೆಗಿಂತ ಹೆಚ್ಚಿದ್ದಲ್ಲಿ, ಹೆಚ್ಚುವರಿ ಹಣವನ್ನು ವಿಮಾ ಸಂಸ್ಥೆ ಪಾವತಿಸುವ ಸೌಲಭ್ಯವೂ ಇದೆ.
▪️ವಿಮೆಯ ಬೆಲೆ: 6 ತಿಂಗಳ ಬಾಡಿಗೆಗೆ 2500 ರೂ.
4. ಮಾಲೀಕರಿಗೂ ವಿಮೆ:
ಬಾಡಿಗೆ ಮನೆಗೆ ಹಾನಿಯಾಗಿ ವಾಸಕ್ಕೆ ಯೋಗ್ಯವಲ್ಲದೇ ಹೋದಾಗ ಮನೆ ಮಾಲೀಕ ಬಾಡಿಗೆ ಆದಾಯವಿಲ್ಲದೆ ನಷ್ಟಕ್ಕೊಳಗಾಗುತ್ತಾನೆ. ಮನೆಮಾಲೀಕರು ಈ ವಿಮಾ ಸೌಲಭ್ಯ ಹೊಂದುವ ಮೂಲಕ ಈ ನಷ್ಟದಿಂದ ಪಾರಾಗಬಹುದು.
▪️ವಿಮೆಯ ಬೆಲೆ: 25,000 ಬಾಡಿಗೆಗೆ 6 ತಿಂಗಳುಗಳ ಕಾಲ 2,000 ರೂ.
ಗೃಹ ವಿಮೆ ವರ್ಸಸ್ ಗೃಹ ಸಾಲ ವಿಮೆ: ಯಾವುದು ಸೂಕ್ತ ?
ಕಾರು, ಬೈಕ್‌ ಸೇರಿ ಯಾವುದೇ ವಾಹನ ಖರೀದಿಸಿದಾಗ, ಸೆಕೆಂಡ್ ಪಾರ್ಟಿ, ಥರ್ಡ್ ಪಾರ್ಟಿ ವಿಮೆ ಮಾಡಿಸುತ್ತೇವೆ. ಅಷ್ಟೇ ಏಕೆ, ಮನೆ ಕಟ್ಟಿಸಿದಾಗ, ಅಪಾರ್ಟ್‌ಮೆಂಟ್ ಖರೀದಿಸಿದಾಗಲೂ ವಿಮೆ ಮಾಡಿಸುವುದು ಅತ್ಯವಶ್ಯಕವಾಗಿದೆ. ಇದರಲ್ಲೇ, ಗೃಹ ವಿಮೆ ಹಾಗೂ ಗೃಹ ಸಾಲ ವಿಮೆ ಎಂಬ ಎರಡು ವಿಭಾಗಗಳಿವೆ. ಇವರಡರ ನಡುವೆ ಇರುವ ವ್ಯತ್ಯಾಸವೇನು? ಯಾವ ವಿಮೆ ಖರೀದಿಯಿಂದ ಏನು ಅನುಕೂಲ? ಯಾವುದು ಸೂಕ್ತ ಎಂಬುದರ ಮಾಹಿತಿ ಇಲ್ಲಿದೆ.
ಬಹಳಷ್ಟು ಮಂದಿಗೆ ‘ಗೃಹ ವಿಮೆ’ ಅಥವಾ ‘ಗೃಹ ಸಾಲ ವಿಮೆ’ಯನ್ನು ಖರೀದಿಸುವ ವಿಷಯದಲ್ಲಿ ಗೊಂದಲಗಳು ಇವೆ. ಜನರು ಸಾಮಾನ್ಯವಾಗಿ ‘ಈ ಪದಗಳನ್ನು ಪರಸ್ಪರ ಬದಲಾಯಿಸುತ್ತಾರೆ. ಒಂದರ್ಥದಲ್ಲಿ ಇವರೆಡು ಬೇರೆಬೇರೆಯಾಗಿದ್ದು, ಸುಲಭದಲ್ಲಿ ಹೇಳುವುದಾದರೆ ಸೇಬು ಮತ್ತು ಕಿತ್ತಳೆ ಇದ್ದಹಾಗೆ ಎಂದು ಹೇಳಬಹುದು.
ಮನೆಯ ರಚನೆ ಮತ್ತು ಅದರ ವಸ್ತುಗಳಿಗೆ ಉಂಟಾಗುವ ಹಾನಿಗಳಿಂದ ಉಂಟಾಗುವ ನಷ್ಟಗಳಿಗೆ ಗೃಹ ವಿಮೆ ರಕ್ಷಿಸುತ್ತದೆ. ಇದಕ್ಕೆ ವ್ಯತಿರಿಕ್ತವಾಗಿ, ಗೃಹ ಸಾಲ ವಿಮೆಯು ಒಬ್ಬ ವ್ಯಕ್ತಿಯನ್ನು (ಅಥವಾ ಅವನ ಕುಟುಂಬವನ್ನು) ಗೃಹ ಸಾಲದ ಹೊಣೆಗಾರಿಕೆಗಳಿಂದ ಅಥವಾ ಸಮಾನ ಮಾಸಿಕ ಕಂತು ಪಾವತಿಗಳಿಂದ(ಇಎಂಐ) ರಕ್ಷಿಸುತ್ತದೆ.
2021ರ ಏಪ್ರಿಲ್ 1ರಂದು ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರವು (ಐಆರ್‌ಡಿಎಐ) ಎಲ್ಲ ಸಾಮಾನ್ಯ ವಿಮಾ ಕಂಪನಿಗಳಿಗೂ ಭಾರತ್ ಗೃಹ ರಕ್ಷಾ ಎಂಬ ಪ್ರಮಾಣಿತ ‘ಗೃಹ ವಿಮಾ ಪಾಲಿಸಿ’ ನೀಡುವುದನ್ನು ಕಡ್ಡಾಯಗೊಳಿಸಿತು. ಉದಾಹರಣೆಗೆ, ಆಗ್ನಿ ಅವಘಡ, ಪ್ರವಾಹ, ಭೂಕಂಪ, ಜ್ವಾಲಾಮುಖಿಯಂತ ವಿಕೋಪಗಳಿಂದ ಯಾವುದೇ ವ್ಯಕ್ತಿಯ ಮನೆ ಮತ್ತು ಅದರಲ್ಲಿರುವ ವಸ್ತುಗಳು ಹಾನಿಗೊಳಗಾದರೆ, ‘ಗೃಹ ವಿಮೆ’ಯು ಜೀವರಕ್ಷಕವಾಗಿ ಕಾರ್ಯನಿರ್ವಹಿಸುತ್ತದೆ.
ಖಾಸಗಿ ಕಂಪನಿಯೊಂದರ ಗೃಹ ವಿಮೆಯ ಸಲಹೆಗಾರ ಕೆವಿನ್ ಮೆಂಡೋನ್ಸಾ ಅವರು ಹೇಳುವಂತೆ, ಹೆಚ್ಚಿನ ವಿಮಾದಾತರು ರಿಪೇರಿ ವೆಚ್ಚ ಆರ್ಕಿಟೆಕ್ಟರ್, ಸರ್ವೇಯರ್ ಶುಲ್ಕಗಳು, ಕಟ್ಟಡ ತೆರವುಗೊಳಿಸುವ ವೆಚ್ಚಗಳು, ಬಾಡಿಗೆ ನಷ್ಟ, ಪರ್ಯಾಯ ವಸತಿಗಾಗಿ ಬಾಡಿಗೆ ಅಥವಾ ನಿರ್ಮಾಣ ವೆಚ್ಚಕ್ಕಾಗಿ ಪ್ರಮಾಣಿತ ಪಾಲಿಸಿಯಲ್ಲಿ ಕವರೇಜ್ ನೀಡುತ್ತಾರೆ. ಕೆಲವು ವಿಮಾದಾತರು ಆಡ್-ಆನ್‌ಗಳ ಮೂಲಕ ಕೆಲವು ಹೆಚ್ಚುವರಿ ಪ್ರಯೋಜನಗಳನ್ನು ನೀಡುವ ಮೂಲಕ ಹೆಚ್ಚುವರಿ ಪ್ರೀಮಿಯಂ ವಿಧಿಸಬಹುದು. ಇದು ಪಾಲಿಸಿಯನ್ನು ದುಬಾರಿಯನ್ನಾಗಿ ಮಾಡುತ್ತದೆ. ಆದ್ದರಿಂದ, ಖರೀದಿದಾರರು ಪ್ರಮಾಣಿತ ಪಾಲಿಸಿಯ ಸೇರ್ಪಡೆಗಳು, ಆ್ಯಡ್-ಆನ್ ಗಳ ಮೂಲಕ ಸೇರ್ಪಡೆಗಳು, ಪಾವತಿಸಬೇಕಾದ ಪ್ರೀಮಿಯಂ ಮೊತ್ತ ಇತ್ಯಾದಿಗಳನ್ನು ಎಚ್ಚರಿಕೆಯಿಂದ ಅಧ್ಯಯನ ಮಾಡಬೇಕು.
ಗೃಹ ಸಾಲ ವಿಮೆ ಹೇಗೆ?
ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಗೆ ನೀವು ಸಾಲದ ಇಎಂಐಗಳನ್ನು ಸಮಯಕ್ಕೆ ಸರಿಯಾಗಿ ಪಾವತಿಸಲು ವಿಫಲವಾದರೇ, ‘ಗೃಹ ಸಾಲ ವಿಮೆ’ಯು ನಿಮ್ಮ ನೆರವಿಗೆ ಬರುತ್ತದೆ. ನೀವು ಮನೆಯ ಮಾಲೀಕತ್ವವನ್ನು ಕಳೆದುಕೊಳ್ಳದಂತೆ ತಡೆಯುತ್ತದೆ. ಅಂದರೆ, ಗೃಹ ಸಾಲ ಮಾಡಿದ ವ್ಯಕ್ತಿಯ ಸಾವು ಅಥವಾ ಇತರ ಪ್ರತಿಕೂಲ ಪರಿಸ್ಥಿತಿಯಿಂದಾಗಿ ಆತ ಇಎಂಐ ಪಾವತಿಸಲು ವಿಫಲನಾದಾಗ, ‘ಗೃಹ ಸಾಲ ವಿಮೆ’ ನೆರವಿಗೆ ಬರುತ್ತದೆ.
ಉದಾಹರಣೆಗೆ, ರಮೇಶ್ ಅವರು ಖಾಸಗಿ ಬ್ಯಾಂಕಿನಿಂದ ಸಾಲ ಪಡೆದಿದ್ದಾರೆ ಮತ್ತು ಅವರು 30 ವರ್ಷ ಇಎಂಐ ಪಾವತಿಸಬೇಕಾಗುತ್ತದೆ ಎಂದು ಭಾವಿಸೋಣ.
ಅಕಸ್ಮಾತ್, ರಮೇಶ್ ಅಪಘಾತಕ್ಕೀಡಾಗಿ ಮರಣ ಹೊಂದಿದರೆ, ಖಾಸಗಿ ಬ್ಯಾಂಕಿನಿಂದ ಬಾಕಿ ಉಳಿದ ಸಾಲದ ಮೊತ್ತವನ್ನು ವಿಮಾದಾತರು ಪಾವತಿಸುತ್ತಾರೆ. ಈ ರೀತಿಯಾಗಿ, ರಮೇಶ್ ಅವರ ಕುಟುಂಬ ಸದಸ್ಯರು ಇಎಂಐಗಳನ್ನು ಪಾವತಿಸುವ ಹೊರೆಯಿಂದ ಮುಕ್ತರಾಗುತ್ತಾರೆ. ವಿಮಾದಾರರ ಮರಣದ ನಂತರ ಮಾತ್ರ ಕೆಲವು ವಿಮೆ ಕಂಪನಿಗಳು ರಕ್ಷಣೆ ನೀಡುತ್ತವೆ. ವ್ಯಕ್ತಿಗೆ ಗಂಭೀರ ಅನಾರೋಗ್ಯ, ಅಪಘಾತ ಅಥವಾ ಕೆಲಸ ಕಳೆದುಕೊಂಡಾಗಲೂ ಕೆಲವು ವಿಮೆ ಪಾಲಿಸಿಗಳು ರಕ್ಷಣೆ ನೀಡುತ್ತವೆ.
“ಗೃಹ ವಿಮೆ ಅಥವಾ ಗೃಹ ಸಾಲ ವಿಮೆಯ ಖರೀದಿಯನ್ನು ಭಾರತೀಯ ವಿಮಾ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ ಹಾಗೂ ಭಾರತೀಯ ರಿಸರ್ವ್ ಬ್ಯಾಂಕ್ ಕಡ್ಡಾಯಗೊಳಿಸಿಲ್ಲ. ಗ್ರಾಹಕರು ಖರೀದಿಸಬೇಕೆ ಅಥವಾ ಬೇಡವೇ ಎಂಬುದನ್ನು ಆಯ್ಕೆ ಮಾಡಬಹುದು. ಆದರೆ ಪಾಲಿಸಿ ವ್ಯಾಪ್ತಿಯ ಪ್ರಕಾರ ಕ್ಷೇಮ್‌ಗಳನ್ನು ಮಾಡಿದರೆ ಎರಡೂ ಅವರಿಗೆ ಅನುಕೂಲ.”
– ಕೆವಿನ್ ಮೆಂಡೋನ್ಸಾ ಗೃಹ ವಿಮಾ ಸಲಹೆಗಾರ
ಇದನ್ನೂ ನೋಡಿ….ಬಿಮಾ ಸಖಿ ಯೋಜನೆ: ಮಹಿಳೆಯರಿಗೆ ದೊರೆಯಲಿದೆ ಪ್ರತಿ ತಿಂಗಳು ₹7000 ವರೆಗೆ ಹಣ.